Ўзбекистон раҳбари Шавкат Мирзиёев 30 январь куни Ислом Каримов номидаги илмий-маърифий ёдгорлик мажмуасига ташриф буюриб, биринчи президент ҳайкали пойига гулчамбар қўйди.
Маросимда Олий Мажлис палаталари, президент администрацияси ва ҳукумат вакиллари, илм-фан ва маданият арбоблари, зиёлилар, шаҳар жамоатчилиги иштирок этди.
"Халқнинг фидойи фарзандлари хотирасини асраб-авайлаш, уларнинг хайрли ишларини эъзозлаш миллий қадриятларимиздир. Улар келажак авлодлар учун ибрат ва йўл-йўриқ бўлиб хизмат қилади. Бугунги тантанали маросим ана шундай юксак ҳурмат-эҳтиром тимсолига айланди. Қуръон оятлари ўқилди, дуо қилинди. Биринчи Президентимизнинг халқимиз фаровонлиги ва манфаатлари йўлидаги тарихий хизматлари, олижаноб инсоний фазилатлари ҳақида сўз юритилди", -дейилади президент матбуот хизмати хабарида.
Қолаверса, давлат раҳбари Ислом Каримов номидаги Илмий-маърифий ёдгорлик мажмуасига ташрифи чоғида Биринчи Президент музейини ташкил этиш ишлари билан ҳам танишди.
шунингдек, Ислом Каримовнинг Самарқанд ва Қарши шаҳарларидаги ҳайкаллари пойига гуллар қўйилди.
