Аввалроқ, ижтимоий тармоқда Бухоро вилоятида мактаб ўқувчилари ўртасида муштлашув содир бўлгани ҳақида хабарлар тарқалди. Вилоят Ички ишлар бошқармаси ахборот хизмати ҳолат юзасидан муносабат билдирди.
Маълум қилинишича, болалар ўртасида оммавий муштлашув Қоровулбозор туманида 25 январь куни содир бўлди.
Мазкур ҳодиса Қоровулбозор тумани ички ишлар бўлимида белгиланган тартибда қайддан ўтказилиб, масъул ходимлар томонидан ҳолатга аниқлик киритиш мақсадида терговга қадар текширув ҳаракатлари олиб борилмоқда.
Дастлабки текширув натижаларига кўра, ушбу ҳолат тумандаги 8-сонли умумтаълим мактабининг 8 ва 9-синф ўқувчилари ўртасида содир бўлган. Ҳозирда ҳодиса иштирокчиларининг шахсига аниқлик киритилган бўлиб, ташқи томондан болаларнинг бирортасида тан жароҳати аломатлари мавжуд эмас.
