Россия президенти матбуот котиби Дмитрий Песков Ўзбекистоннинг “уч томонлама газ иттифоқи”да иштирок этишдан бош тортгани ҳақидаги маълумотлар ҳақиқатга тўғри келмаслигини айтди.
“Уч томонлама газ иттифоқи” таклифи газни сиёсий шартларга айирбошлашни назарда тутмайди, гап иштирокчи давлатлар манфаатлари йўлида тижорат манфаатларини мувофиқлаштириш ҳақида кетмоқда”, — деди Россия президенти матбуот котиби раҳбари Дмитрий Песков.
Унинг сўзларига кўра, ҳар бир томон ўз энергетика ресурсларини сотишда давом этади, тижорат шартларига эътибор қаратади.
Эслатиб ўтамиз, аввалроқ Ўзбекистон энергетика вазири Россия ва Қозоғистон билан “уч томонлама газ иттифоқи” ташкил этилишига изоҳ берган эди. Унга кўра, миллий манфаатлардан келиб чиқиб, қўшни давлатлардан табиий газ ва электр энергияси импорти уларнинг энергия тармоқларини ўтказиш йўли билан эмас, балки тижорат шартномалари асосида амалга оширилади.