Бош вазир ўринбосари, Энергетика вазири Жўрабек Мирзамаҳмудов аҳолининг электр энергиясига бўлган эҳтиёжини қондира олмаётганида вазирликни айблади.
"Етарли даражада эҳтиёжни қондира олмаганимиз, бу бизни айбимиз. Эҳтиёжни қондириш ва ички ресурслар билан таъминлаш бўйича барча чоралар кўриляпти. Лекин, шунга қарамай қандайдир ҳажмларда импорт қилишга ҳам эҳтиёж туғилмоқда.
Бу масалани ечиш мақсадида ҳозирги кунда қандайдир алянц ёки иттифоқ эмас, балки қўшни давлатлардан бизнинг эҳтиёжимиз учун зарур бўлган нафақат табиий газ, балки электр энергияни ҳам оляпмиз. Ички истеъмолни таъминлаш мақсадида табиий газ ва электр энергияни импорт қилиш бўйича музокаралар олиб бориляпти.
Бугунги кунда миллий манфаатлардан келиб чиққан ҳолда ўзимизнинг энергия тармоқларни кимгадир бериб юбориш эмас, олди-сотди тижорий шартномалар асосида ҳамкорлик қилиш бўйича музокаралар олиб бориляпти", — деди Энергетика вазири Жўрабек Мирзамаҳмудов.