Жорий йилнинг 22 октябрь куни “Ўзбекистон” метрополитенининг “Aлишер Навоий” бекатида 2003 йилда туғилган қиз автоматик ўтказиш пунктининг биринчи вестибюлида ўз хизмат вазифаларини бажараётган Метрополитенда хавфсизликни таъминлаш бошқармаси ходими томонидан тўхтатилган.
Ходим Н.С.дан унинг сумкани кўришни сўраганида, у сумкасида бомба борлигини айтган. Кўрсатмаларга кўра, МХТБ ходимлари зудлик билан яқин атрофдаги ҳудудни ўраб олган ва воқеа ҳақида навбатчилик бўлимига хабар берган. Шундан сўнг воқеа жойига ИИВ Махсус операцияларни мувофиқлаштириш бошқармаси гуруҳи етиб келган, дея хабар берди ИИВ Транспорт ва туризм объектларида хавфсизликни таъминлаш департаменти Ахборот хизмати.
Аниқланишича, қиз вақтинча ҳибсга олинган. Қизнинг сумкасини кўздан кечириш чоғида ундан портловчи мослама топилмаган. Шундан сўнг далолатнома тузилган. Ходимлар қиздан нима учун сумкасида бомба бор деб айтганини сўраганида, Н.С. унинг кайфияти яхши ва шу тарзда ҳазил қилишга қарор қилдим, деб жавоб берган. Қиз ходимлар томонидан Шайхонтоҳур тумани 3-сонли ИИБга олиб кетилган.