Самарқандда фолбин ва унинг қизини ўлдирган эркакка суд ҳукми ўқилди. Бу ҳақда “Замон” информацион дастурида маълум қилинди.
Маълум қилинишича, эркак турмуш қурганидан кейин узоқ вақт фарзанд кўрмаган. Шу сабаб у Эсабой қишлоғидаги фолбинга борган.
Фолбин эркакка шифокорга бормаслиги, қариндошлари фарзандли бўлмаслиги ва ўз жонига қасд қилиш учун ўқитганлигини айтган. Шунингдек, фолбин агар у тайёрлаб берган сувни сепса, ҳаммаси яхши бўлишини айтиб, ундан бунинг учун $500 талаб қилади.
Фолбин cўралган пулни бермагани учун эркакни уйидан чиқариб юборган. Эркакнинг айтишича, у фолбинга пул бермагани учун фолбин уни ўлдириши мумкинлигини ўйлаб, қотилликка қўл урган.
Бир куни у фолбиннинг уйига бориб, фолбинни болта билан уриб ўлдирган. Шу пайт шовқиндан уйғонган фолбиннинг қизи уйғониб қолган. Эркак қизни ҳам ўлдирган.
“Ёрдам қилинг дедим. У ёрдам қилмайман деди. Пул бераман десам ҳам ўлдираман деди, пул бермайман десам ҳам ўлдираман деди. Қариндошларимга пул бериб, мени ўлдиришга ёллаган экан. Сени барибир ўлдираман деганидан кейин иложи бўлмади”, - дейди судланувчи.
Эркакка нисбатан суд ҳукми ўқилди. Ҳукмга кўра, судланувчи 20 йилга озодликдан маҳрум қилинди.