Бугун, 10 март куни Ўзбекистонга Россия ҳукумати ва БМТнинг ОИВ/ОИТС бўйича бирлашган дастури (UNAIDS) томонидан 300 минг долларлик кўчма диагностика мажмуаси топширилди. Бу ҳақда Санитария-эпидемиологик осойишталик ва жамоат саломатлиги хизмати хабар берди.
Кўчма диагностика мажмуаси республиканинг бориш қийин ва чекка ҳудудларида яшовчи аҳолига бирламчи тиббий ёрдам кўрсатиш, шу жумладан ОИВ инфекциясини текшириш ва олдини олиш хизматларидан фойдаланиш имкониятини беради.
Мажмуа инструментал, лаборатория, функционал ва ультратовуш диагностикаси учун тиббий ускуналар тўплами билан жиҳозланган. Лаборатория жиҳозлари, функционал диагностика билан жиҳозланиш мобил клиникаларни офлайн режимда ишлатиш ва ишлаб чиқариш ҳажмини ошириш имконини беради.
