Миллий гвардия матбуот хизматининг хабар беришича, меҳрибонлик уйи ўрнида савдо объектлари қурилиши ҳақидаги тахминлар асоссиз.
“21-сонли “Меҳрибонлик” уйи биноси ва ҳудуди Халқ таълими вазирлиги балансида қолмоқда. Бу ерда болалар муассасаси ҳам бўлади, унинг тури ва мақоми эндиликда вазирлик томонидан белгиланади. Бу яқин кунларда маълум бўлади”, — дейилади хабарда.
Aввалроқ мамлакатда 13 та Меҳрибонлик уйи, 4 та болалар шаҳарчаси ва 2 та меҳрибонлик уйи ёпилган эди. Ихтисослаштирилган мактаб-интернатлар илгари Меҳрибонлик уйларига қарашли бўлган 6 та объектда жойлашган. Қўқон шаҳридаги собиқ 12-Меҳрибонлик уйи биносида кўзи ожиз болалар учун ихтисослаштирилган мактаб-интернат фаолият кўрсатмоқда. Марғилон шаҳрида 1-Меҳрибонлик уйи ўрнида эшитиш қобилияти паст ва кар болалар учун ихтисослаштирилган мактаб-интернати фойдаланишга топширилди.
Таъкидланишича, айни дамда аввал ёпилган “Меҳрибонлик” уйларининг қолган қисмида қайси болалар муассасалари очилиши бўйича қарорлар қабул қилинмоқда.
“Aввал ёпилган барча таълим муассасаларидан фақат болалар манфаатлари йўлида фойдаланилади”, — дейилади Миллий гвардия хабарида.
Эслатиб ўтамиз, аввалроқ Тошкентдаги 21-сонли Меҳрибонлик уйи ёпилгани ҳақида хабар берган эдик. Уйнинг 27 нафар тарбияланувчиси пойтахтнинг Чилонзор туманидаги A. Хлебушкина номидаги 22-сонли таълим муассасасига ўтказилди.