Россия Федерациясининг Ульяновск вилояти ҳудудида содир бўлган йўл-транспорт ҳодисаси оқибатида Қирғизистон фуқароларининг нобуд бўлгани ва жиддий жароҳат олгани муносабати билан Ўзбекистон президенти Шавкат Мирзиёев Қирғизистон президенти Садир Жапаровга ҳамдардлик билдирди. Бу ҳақда Ўзбекистон президенти Матбуот котиби Шерзод Асадов хабар берди.
Давлат раҳбари қардош Қирғизистон халқига чуқур таъзия изҳор этиб, ҳалок бўлганларнинг оила аъзолари ва яқинларига самимий ҳамдардлик сўзларини етказишни сўради, жабрланганлар шифо топишини тилади.
Эслатиб ўтамиз, Ульяновск вилояти ҳудудида иккита юк машинаси ва битта йўловчи автобуси тўқнашиши натижасида дастлабки маълумотларга кўра, 16 киши ҳалок бўлган, улардан 14 нафари Қирғизистон Республикаси фуқароси бўлган.
