Чортоқ тумани "Султон Увайс Қараний" зиёратгоҳида бўлган Қуръони Карим китобининг қўлёзма нусхаси номаълум шахслар томонидан ўғирлаб кетилган эди.
Наманган вилояти ички ишлар бошқармаси томонидан олиб борилган тезкор қидирув ишлари натижасида китоб Наманган шаҳридаги кўп қаватли уйларнинг хонадонларидан бирида яширинча сақланиб келинаётганлиги аниқланган. Бу ҳақда Наманган ИИБ хабар берди.
Хабарга кўра, ўғирликда гумон қилинаётган икки нафар шахс қўлга олинган. Ашёвий далил сифатида олинган Қуръони Карим китобининг қўлёзма нусхасига ҳеч қандай зарар етмаган.
“Гумонланувчилар Жиноят процессуал кодексининг 221- моддаси тартибида ушланиб, қамоққа олинган. Ҳозирда қўзғатилган жиноят иши бўйича тергов ҳаракатлари олиб борилмоқда”- дейилади хабарда.