Бош прокуратура ҳузуридаги Департамент ҳамда Давлат божхона қўмитасининг Тошкент вилояти бошқармалари томонидан ҳамкорликда ўтказилган тезкор тадбирларда дори воситаларини ноқонуний сотаётган шахслар ушланди.
Хусусан, Тошкент туманида фуқаро Х.Н. ноқонуний даромад орттириш мақсадида 5 минг дона “Гепарин” дори воситасини дорихона ва унинг филиалларидан ташқарида харидорга $20 мингга сотаётганида қўлга олинди.
Худди шундай ҳолат Янгийўл туманида ҳам содир бўлди.
Фуқаро И.И. 8 минг “HepaCare” номли дори воситасини 148,8 млн сўмга сотаётган вақтида ашёвий далиллар билан ушланди.
Мазкур ҳолатлар бўйича Х.Н. ва И.И.ларга нисбатан Жиноят кодексининг 186-3-моддаси (дори воситаларини дорихоналардан ва уларнинг филиалларидан ташқарида реализация қилиш) билан жиноят ишлари қўзғатилиб, тергов ҳаракатлари ўтказилмоқда.