Қорақалпоғистондаги тартибсизликлар чоғида ҳарбий бронетранспортёрлардан бири намойишчилар томонидан олиб кетилган, ичкарида бўлган аскарлар эса калтакланган.
Мудофаа вазирлиги Матбуот хизмати жароҳатланган ҳарбий хизматчилар билан суҳбат тайёрлади.
“Бизга қурол ишлатмаслик буюрилган. Чунки у ерда тинч аҳоли, оддий фуқаролар бор эди”, - дейди БТР экипажи командири Рустам Бобожонов.
Шунингдек, у турли хил ашёлар билан қуролланган юзлаб фуқаролар ҳарбий техникани қандай тортиб олгани ҳақида гапириб берди.
“500 метр юрганимизда БТР ҳайдовчисининг айтишича, тахминан 1 км дан кейин 300-400 кишилик оломон йўлни тўсиб қўйган, улар арматура, лом, тош, молотов коктейллари билан қуролланган. Кейин ҳарбий қисм билан боғланиб, ёрдам кераклигини айтдим.
Олдинда 300-400, орқада 100-200 киши ҳарбий техникага яқинлаша бошлади. Ўнлаб фуқаролар бронетранспортёрни турли буюмлар билан уриб, ойналарини синдира бошлади”, — деди ҳарбий хизматчи.
"Aсосий мақсадимиз қорақалпоқ халқининг тинчлиги ва осойишталигини асраш эди. Шунинг учун биз зирҳли транспортёрни одамларга қаратмадик, қурол ишлатмадик. Биз у ерда ҳамма нарсага чидадик, йигитлар билан қасамёдга садоқатимизни исботладик”, — дея хулоса қилди Бобожонов.