Олмазор ва Шайхонтохур туманларида истиқомат қилувчи республикада фаолияти тақиқланган "Ҳизб ут-Таҳрир" экстремистик ташкилоти аъзоларининг фаолиятига чек қўйилди. Бу ҳақда ИИВ Матбуот хизмати хабар берди.
Ушбу жиноий гуруҳнинг фаол аъзоси бўлган "И.А" 10 нафардан ортиқ синфдошларини Telegram'даги "Чойхона" ва "Иймонлашайлик" номли виртуал гуруҳларга қўшиб, тақиқланган материалларни тарқатиб келган.
Шунингдек, И.А. яқинлари ва кўплаб танишларини таҳрирчилар сафига аъзо бўлишга даъват қилиб, интернет орқали экстремистик мазмундаги аудио ва видео материалларни тарқатиб келган.
Ўз навбатида гуруҳ аъзолари мазкур материаллар билан танишиб, "Ҳизб ут-Таҳрир" ДЭТ фаолиятини қўллаб-қувватлаб келишган.
Мазкур жиноий гуруҳнинг фаолияти айни пайтда Польшада яшириниб келаётган "Ҳизб ут-Таҳрир" ДЭТнинг ғоявий етакчиларидан бири бўлган, Ўзбекистондаги ва хориждаги ўзбекистонликларни радикаллашувига ҳамда жиноятчига айланиб қолишларига сабабчи бўлаётган “Маҳмуд Абдулмўмин” тахаллусли 1980 йилда Қирғизистонда туғилган, мазкур давлат фуқароси ва содир этган жиноятлари учун халқаро қидирувда бўлган Холдаров Махмуджон Абдумаликович томонидан бошқарилган.
