19 июнь куни Афғонистон Ислом Амирлиги ташқи ишлар вазири вазифасини бажарувчи Амирхон Муттаки Кобулда президентнинг ташқи сиёсат бўйича махсус вакили Абдулазиз Комилов ва Ўзбекистон Президентининг Афғонистон бўйича махсус вакили Исматулла Иргашев билан учрашди. Бу ҳақда ҳукуматдаги расмий манбаларга таяниб, Kabul Times хабар бермоқда.
Учрашувда Афғонистон ва Ўзбекистон ўртасидаги икки томонлама муносабатлар, икки давлат ўртасидаги транзит ва савдони мустаҳкамлаш масалалари муҳокама қилинди. Абдулазиз Комилов икки давлат хавфсизлигининг ўзаро боғлиқлигини таъкидлаб, ўзаро савдо ва транзитни йўлга қўйиш учун яқиндан мувофиқлаштириш зарурлигини таъкидлади.
Абдулазиз Комилов, шунингдек, Амир хон Муттакини Ўзбекистонда бўлиб ўтадиган иқтисодий анжуманда иштирок этишга таклиф қилди.
Афғонистон ташқи ишлар вазири Абдулазиз Комиловга Кобулга ташрифи учун миннатдорлик билдириб, уни янги лавозими билан табриклади, шунингдек, Афғонистон билан сиёсий, иқтисодий ва ижтимоий соҳалардаги ҳамкорлик учун миннатдорлик билдирди.