Осиё футболи конфедерацияси Тартиб-интизом қўмитаси U-23 Осиё кубоги чорак финали доирасидаги Ўзбекистон – Ироқ учрашувида юз берган воқеалар юзасидан қарор чиқарди.
Унга кўра, Ўзбекистон – Ироқ U-23 терма жамоалари ўртасидаги учрашувда бош ҳакам томонидан дарвозабони Aбдувоҳид Неъматов майдондан четлатилганидан сўнг, стадиондаги томошабинлар томонидан майдонга турли хил буюмлар улоқтирилган, оқибатда ўйин бир неча дақиқага тўхтаб қолган.
ОФК Тартиб-интизом қўмитаси юзага келган вазиятларни ўрганиб чиқиб, Ўзбекистон U-23 терма жамоаси футболчиси Aбдувоҳид Неъматовга нисбатан 3 та ўйинга четлатиш (дисквалификация) ва 500 доллар жарима интизом чорасини қўллаш, Ўзбекистон терма жамоасининг ярим финал доирасида Японияга қарши учрашувини мухлисларсиз ўтказиш ҳамда ЎФАга $50 минг жарима интизом чорасини қўллаш юзасидан қарор чиқарди.
Шунингдек, Тартиб-интизом қарорига кўра, ярим финал доирасидаги баҳсда 500 нафаргача япониялик футбол ишқибозларини учрашувга киришига рухсат берилди.