Бухоро вилояти ФВБ Матбуот хизматининг хабар қилишича, бугун, 11 июнь куни соат 04:10 да Когон шаҳар Газчилар қўрғони 5-уйда жойлашган "Когон магистраль газ қувурлари" бошқармасида ёнғин содир бўлган.
Қайд этилишича, бинонинг асосий умумий майдони 720 кв.м. бўлиб, корхонада 4 та газ ҳайдаш ускунаси мавжуд. Ёнғин бинодаги 1-газ ҳайдаш ускунасида содир бўлган. Натижада, корхонанинг 720 кв.м. майдонда том қисми, ички деворлари ва ичидаги агрегатлар қисман ёнган.
Ёнғиннинг соат 04:40 да олди олиниб, 05:50 да тўлиқ ўчирилган. Воқеа жойига 10 та ёнғин қутқарув автоэкипажи жалб этилган.
Бирламчи маълумотга кўра, ёнғиннинг тахминий сабаби технологик жараённинг бузилиши оқибатида содир бўлганлиги айтилмоқда. Ҳозирда моддий зарар миқдори ёнғин техник комиссияси томонидан аниқланмоқда.
Ёнғин оқибатида фуқароларнинг куйиш, тан жароҳати, ҳалок бўлиш ҳолатлари қайд этилмади.