Атабек Назиров инвестициялар ва ташқи савдо вазирининг маслаҳатчиси – Ўзбекистоннинг тўғридан-тўғри инвестициялар жамғармаси бош директори этиб тайинланди. Бу ҳақда Инвестициялар ва ташқи савдо вазирлиги Матбуот хизмати хабар берди.
У бунга қадар Капитал бозорини ривожлантириш агентлиги директори лавозимида ишлаб келаётганди.
Атабек Назиров 1998 йилда макроиқтисодиёт ихтисослиги бўйича АҚШдаги Нью-Йорк давлат университетини тамомлаган. У АҚШдаги Goldman Sachs ва JPMorgan Chase, Россиядаги Тройка Диалог ва МДМ-Банк каби йирик молиявий ва инвестиция компанияларида, шунингдек, Лондон шаҳрида Европа тикланиш ва тараққиёт банкида ишлаган.
Эслатиб ўтамиз, ушбу жамғарма рақобатбардош маҳаллий компанияларга инвестициялар киритиш, шунингдек, хусусий маҳаллий ва хорижий инвесторлар билан узоқ муддатли ўзаро фойдали шериклик муносабатларини йўлга қўйиш мақсадида ташкил этилган.