Наманган вилояти ИИБ Ахборот хизмати “Навбаҳор”–“Пахтакор“ учрашувидаги вазият юзасидан дастлабки берган маълумотларини тўлдирди.
Унга кўра, дастлабки маълумотда учрашувдан кейинги тартибсизликда ҳудудий ИИБга олиб кетилгани айтилган фуқароларнинг сони 2 нафардан 7 нафарга кўпайган.
“Ҳолат бўйича Ўзбекистон Республикаси Жиноят кодексининг 277-моддаси 3-қисми "в", "г" бандлари бўйича жиноий иш қўзғатилиб, ҳозирга қадар 6 нафар фуқаро Ўзбекистон Республикаси Маъмурий жавобгарлик тўғрисидаги кодекснинг 183-моддаси, 1 нафар фуқаро эса 183- ва 194-моддалари бўйича жавобгарликка тортилди”, дейилади вилоят ИИБ Ахборот хизмати хабарида.
Эслатиб ўтамиз, 7 апрель куни “Навбаҳор” ва “Пахтакор“ жамоалари ўртасидаги ўйин 1-2 ҳисобида “Пахтакор”нинг ғалабаси билан якунлангач, мезбон жамоанинг мухлислари томонидан ўйиннинг 89-дақиқасида белгиланган пенальти борасида эътирозлар келиб чиққан эди.
