Ўзбекистонда илк бор ГАЭС (Гидроаккумляцияловчи электр станцияси) қурилади. Бу ҳақда 14 апрель куни “Ўзбекгидроэнерго” раҳбарияти ҳамда Франциянинг энг йирик электр энергия ишлаб чиқарувчи “EDF” компаниясининг халқаро алоқалар, Европа ва МДҲ мамлакатлари бўйича масъул вакиллари иштирокидаги учрашувда маълум қилинди.
Учрашувда Ўзбекистонда илк бор ГАЭС қурилиши, сув омборларида сузувчи қуёш станцияларини ўрнатиш, икки томондан махсус ишчи гуруҳлар тузиш ҳамда асосий ташкилий масалаларни муҳокама қилиш борасида икки томонлама ҳамкорликни амалга ошириш бўйича дастлабки келишувларга эришилган ва ўзаро амалий ҳамкорлик бўйича меморандум имзолашга келишиб олинган.
Тошкент вилоятининг Бўстонлиқ туманида жойлашиши айтилаётган Хўжакент ГАЭСнинг лойиҳавий қуввати 200 МВт га тенг бўлади.
Маълумот учун, гидроаккумуляция электростанцияси (ГАЭС) – электр энергияга бўлган кунлик талабга яраша электр энергия ишлаб чиқарувчи гидроэлектростанция. ГАЭС ўз фаолиятида генераторлар ёки насослар, гидроэлектроагрегатлар комплексини қўллаб ишлайди.
