Наманган вилояти прокуратураси Ахборот хизмати хабарига кўра, 24 апрель куни соат 14:10 ларда қурилиши тугалланмаган кўп қаватли уйларга канализация тармоғини тортиш учун траншея ковлаш ишлари олиб борилаётганда бахтсиз ҳодиса содир бўлди.
Тупроқ қатламининг ўпирилиб кетиши натижасида 4,5 метр чуқурликдаги траншея ичида ишлаётган 2 нафар ёлланма ишчилар тупроқ остида қолиб, ҳодиса жойида вафот этган.
Аниқланишича, “Azizbek Avtogaz Servis” МЧЖ томонидан канализация тармоғини тортиш учун ер участкасида қазиш ишларини амалга оширишга шаҳар ҳокимининг тегишли рухсатномаси олинмаган.
Ҳозирда вафот этган шахсларнинг ўлими сабабларини аниқлаш юзасидан суд-тиббий экспертизаси тайинланди.
Мазкур ҳолат юзасидан Жиноят кодексининг 257-моддаси 2-қисми “б” банди билан жиноят иши қўзғатилиб, дастлабки тергов ҳаракатлари олиб борилмоқда.