Сурхондарё вилоятида «Аёллар дафтари»га киритилган ишсиз хотин-қизлар учун Ўзбекистон Республикаси Гендер тенгликни таъминлаш масалалари бўйича комиссия томонидан ҳунармандчилик йўналиши бўйича кичик кластерларни ташкил этишга қаратилган лойиҳа ташкил этилди.
Ушбу лойиҳа тол ва қамишдан турли хил ҳунармандчилик маҳсулотларини ясашга мўлжалланган. Лойиҳанинг бошланғич босқичида 30 нафар ишсиз хотин-қизлар ҳунарга ўргатилди. Мақсад лойиҳа доирасида ўқиган аёллар «Устоз-шогирд» анъанаси асосида ўз туманларидаги 10 нафардан 40 нафаргача ишсиз хотин-қизларни ҳунарга ўргатиш орқали кўпроқ ишсиз аёлларни қамраб олишдан иборат. Натижада Сурхондарё вилояти бўйича 1000дан ортиқ ишсиз хотин-қизларнинг бандлиги таъминланишига эришилади.
Ушбу лойиҳанинг афзаллиги ҳунармандчилик маҳсулотлари учун ишлатиладиган хомашё манбалари ва сотиш учун бозор билан таъминланганлигидир.
Ҳунар ўрганган хотин-қизларни доимий хомашё билан таъминлаб туриш учун, Сурхондарё вилояти ҳокимияти билан биргаликда тол плантациясини яратиш бўйича келишилди.
Ҳозирча сават учун ишлатиладиган тол Англия давлатдан олиб келиниб, бир йил давомида Комиссия томонидан таъминлаб турилади.
Бир йилдан кейин Сурхондарё вилоятида ташкил этилган тол плантациясидан ҳосил олиш бошланади ва натижада вилоят ўз имкониятидан келиб чиқиб ҳунарманд хотин-қизларимизни хомашё билан доимий таъминланишига эришилади.
Хотин-қизлар томонидан тўқилган саватлар доимий ҳунармандчилик кластери томонидан сотиб олинади ва Россия, Хитой ва қўшни давлатларга экспорт қилинади.
Сурхондарё вилоятида бундай лойиҳаларни амалга ошириш давом эттирилади. Навбатдаги лойиҳа асосида ҳудуд имкониятларидан келиб чиқиб, жундан ҳар хил ҳунармандчилик маҳсулотларини тўқиш бўйича маҳорат дарси ташкил этиш режалаштирилган.