Туркияда 29 апрелдан бошлаб кучга кирадиган комендант соати хорижлик сайёҳларга амал қилмайди. Бу ҳақда мамлакат Ички ишлар вазирлигининг берган фармойишида маълум қилинди.
Туркия ИИВ фармойишида айтилишича, хорижлик сайёҳлар мамлакат аҳолиси тўлиқ карантин талабларига риоя қилиши мажбур бўлган пайтда эркин ҳаракатланишлари мумкин.
Бироқ ушбу қоида мамлакатда яшаш учун гувоҳнома олган хорижликларга нисбатан амал қилмайди. Улар тўлиқ белгиланган қоидаларга риоя қилишлари шарт.
Туркияга қисқа муддатга келган сайёҳлар кўчага чиқишлари мумкин.
“Хорижлик сайёҳлар паспортлари билан эркин саёҳат қилишлари, музейлар ва археологик ёдгорликларга бориши мумкин. Туркияда сайёҳ бўлиш айни пайтда манфаатли”, - деди Туркия туризм вазири Нури Эрсўй.
Эслатиб ўтамиз, Туркия 29 апрелдан 17 майгача тўлиқ локдаунга кирмоқда. Ўзбекистон ТИВ ватандошларни бу борада огоҳлантирганди.