Микрокредит янги рўйхатга олинган юридик шахс бўлмаган якка тартибдаги тадбиркорлар ва оилавий тадбиркорлик субъектларига (кейинги ўринларда – қарз олувчи) давлат рўйхатидан ўтказилган кундан бошлаб 6 ой мобайнида тадбиркорлик фаолиятини юритишлари учун 100 ЭКИҲгача берилади.
Микрокредит қарз олувчига юридик шахс бўлмаган якка тартибдаги тадбиркорлар шуғулланиши мумкин бўлган фаолият турларига бир йиллик имтиёзли давр билан уч йил муддутга берилади.
Микрокредитдан фойдаланганлик учун фоиз ставкаси миқдори Марказий банкнинг қайта молиялаш ставкаси даражасидан юқори бўлмаган миқдорда, банкнинг Имтиёзли кредитлаш жамғармаси ҳисобидан микрокредит ажратилган тақдирда Марказий банкнинг қайта молиялаш ставкасининг 50 фоизи миқдорида белгиланади.
Фоиз ставкаси миқдори Марказий банкнинг қайта молиялаш ставкаси камайишига қараб камайиши мумкин. Аммо Марказий банкнинг қайта молиялаш ставкаси оширилган тақдирда шартномада кўрсатилган фоиз ставкаси ўзгаришсиз қолдирилади.
Қарз олувчилар микрокредит олиш учун банкка ариза тақдим этиб, унга қуйидаги ҳужжатларни илова қилишлари лозим:
1. қарз олувчининг банк ҳисоб рақамига пул тушумлари прогнози кўрсатилган бизнес-режа;
2. кредит таъминоти турларидан бири (20 ЭКИҲгача микрокредит ҳисобига олинган товарлар кредит таъминоти ҳисобланади, 60 ЭКИҲгача микрокредит бўйича эса фуқароларнинг ўзини ўзи бошқариш органларининг кафиллиги кредит таъминоти бўлиши мумкин).
Қарз олувчи ҳужжатларни топшириш жараёнида ўзининг шахсини тасдиқловчи ҳужжатини кўрсатади ва ҳужжатдан нусха тақдим этади.
Қарз олувчилар аризани электрон шаклда ҳам беришлари мумкин, деб хабар қилади "Norma.uz”.
Банк аризани олганидан сўнг 3 иш куни мобайнида уни кўриб чиқиши ва микрокредит бериш ёки уни беришни асослантирилган ҳолда рад этиш ҳақида қарор қабул қилиши шарт. Микрокредит бериш рад этилган тақдирда банк қарз олувчига бу ҳақда ёзма равишда маълум қилади. Микрокредит бериш тўғрисида қарор қабул қилинган тақдирда банк ва қарз олувчи ўртасида ёзма шаклда шартнома тузилади ҳамда қарз олувчи томонидан тақдим этилаётган кредит таъминоти тури қонун ҳужжатларида белгиланган тартибда расмийлаштирилади.
Шартнома тузилиб, кредит таъминоти расмийлаштирилганидан сўнг банк қарз олувчига кредит ҳисоб рақамини очади. Микрокредит қарз олувчига пул ўтказиш йўли орқали берилади.
Банклар томонидан микрокредитдан фойдаланишнинг тўлиқ муддати давомида фуқароларнинг ўзини ўзи бошқариш органлари ходими иштирокида микрокредитдан самарали ҳамда мақсадли фойдаланилаётганлигини аниқлаш бўйича доимий мониторинг ишлари олиб борилади. Мониторинг қарз олувчининг шартнома шартларини бажариши учун ёрдам кўрсатишга йўналтирилган бўлиши керак.
Мониторинг натижасидан келиб чиқиб банк фуқароларнинг ўзини ўзи бошқариш органлари ходими билан биргаликда қарз олувчи иштирокида тегишли далолатнома тузади. Микрокредитдан белгиланган мақсадларда фойдаланилмаганлиги аниқланган тақдирда банк кредитнинг бошқа мақсадда ишлатилган қисмини қарз олувчидан муддатидан олдин ундириб олишга ҳақли.