Мисрнинг “Ал-Азҳар” таълим мажмуасида ўқишни истаган Ўзбекистон фуқаролари Маслаҳат кенгашига ҳужжат топширади. Бу ҳақда Дин ишлари бўйича қўмита Матбуот хизмати хабар берди.
Қайд этилишича, “Ал-Азҳар” таълим мажмуасининг барча муассасаларига Ўзбекистон фуқароларини қабул қилиш бўйича мурожаатлар жорий йил учун 25 июндан – 15 июльгача қабул қилинади.
Келаси йилги қабул муддати йил давомида, 2021 йил 1 августдан 2022 йил йил 30 июнгача Маслаҳат кенгаши томонидан кўриб чиқилади.
“Ал-Азҳар”да ўқиш ниятида бўлганлар қуйидаги ҳужжатларнинг нусхаларини топширади:
— Ариза (намуна бўйича);
— Фуқаролик паспорти ёки ID-карта нусхаси;
— Умумий ўрта таълим (11-синф негизида шаҳодатнома, аттестат), ўрта махсус, касб-ҳунар таълими ёки олий таълим муассасасини тугатганлиги ҳақидаги ҳужжат;
— Фуқаронинг шахсий маълумотномаси (намуна бўйича намуна тўлдириш шакли) ва таржимаи ҳоли (эркин шаклда).
Номзодларнинг мурожаатлари Маслаҳат кенгаши Ишчи гуруҳи томонидан жорий йил 16-30 июль кунлари кўриб чиқилади ҳамда Ишчи гуруҳи билан ўтказилган суҳбат натижасига кўра “Ал-Азҳар” таълим мажмуасида ўқишга тавсия этилган фуқаролар рўйхати тавсия хати асосида “Ал-Азҳар” мажмуаси институтлари департаменти администрациясининг электрон манзилига юборилади.
