1 июль куни кечаси Тошкент шаҳар ҳокими Жаҳонгир Ортиқхўжаев ДХХ тасарруфидаги “Ёшлик” спорт-соғломлаштириш мажмуасига ташриф буюрди. Бу ҳақда пойтахт ҳокимлиги Матбуот хизмати хабар берди.
Ушбу мажмуада 2 июлдан бошлаб коронавирусга гумон қилинган беморларни қабул қилиш ва биринчи ёрдам кўрсатиш бўйича тақсимлаш маркази сифатида очилади. Ҳоким 500 ўринлик марказ шароитлари билан танишди.
Жаҳонгир Ортиқхўжаев 3 июлдан 770 ўринлик “Универсал” спорт мажмуасидаги тақсимлаш маркази ҳам қайта очилишини таъкидлади.
“Ўзэкспомарказ” миллий кўргазма мажмуасидаги тақсимлаш маркази 5 июлдан очилиши режалаштирилмоқда. Тошкентда умумий ҳисобда 2 мингдан ортиқ ўринга эга заҳира шакллантирилади.