ИИВ Матбуот хизматининг хабарига кўра, жорий йилнинг октябрь ойида Сеул шаҳрида Ўзбекистондаги Интерпол ММБ, Тошкент вилояти ИИББ ва Жанубий Кореянинг Интерпол ММБ ходимлари ҳамкорликдаги тезкор-қидирув тадбирлари ўтказилган.
Натижасида, республика ҳуқуқ-тартибот идоралари томонидан Ўзбекистон ЖКнинг 169-моддаси 2-қисми, 168-моддаси 2-қисми билан белгиланган оғир жиноятларни содир этганлиги учун халқаро миқёсда қидирувда бўлган 30 ёшли шахс қўлга олинган.
Олинган маълумотларга асосан, Сеулда хизмат сафарида бўлган катта миқдордаги фирибгарлик жиноятини содир этгани учун қидирувда бўлган яна бир Ўзбекистон фуқароси 64 ёшли Ж.Н. Интерпол каналлари томонидан қўлга олинган.
2016 йилда Ж.Н. фуқароларга алдов йўли билан Тошкент шаҳридан кўчмас мулк харидида ёрдам беришини ваъда қилиб, улардан олган пулларни мажбуриятларини бажармай ўз эҳтиёжлари учун сарфлаб юборган.
“Бугунги кунда мазкур иккала шахс ҳам қўлга олиниб, Ўзбекистонга топширилди ва энди улар қилмишлари учун судда жавоб беришларига тўғри келади”, - дейилади хабарда.