29 июль куни Ўзбекистонга АҚШдан 3 миллион доза Moderna компанияси вакцинаси олиб келинади. Бу ҳақда "Дунё" АА хабар қилди.
Вакциналар ЖССТнинг COVAX дастури орқали ажратилади ва 29 июль куни АҚШнинг Алабама штатидан махсус рейс билан Ўзбекистонга етказилади.
АҚШ Касалликларни назорат қилиш ва олдини олиш марказининг (CDC) маълумотига кўра, Moderna вакцинаси COVID-19’ни 94 фоиздан юқори самарадорлиги билан олдини олади.
Шунингдек, АҚШ Озиқ-овқат ва дори воситалари сифати назорати бошқармаси (FDA) 18 ёшдан катта шахсларда коронавирусни олдини олиш учун Moderna вакцинасини маъқуллади.
Қайд этилишича, эмлаш курси бир ойлик оралиқда 2 дозадан иборат.
“Бу вакцинани нормал совуткичда сақлаш мумкин, бу эса вакциналарнинг ҳудудларга тақсимланишида қийинчилик туғдирмайди”, - дейилади хабарда.
