Автомобиль транспортида юк ташувчиларни қўллаб-қувватлаш борасида президент қарори қабул қилинди.
Қарорга кўра, юк ташиш учун мўлжалланган, ишлаб чиқарилганига 7 йилдан ошмаган қуйидаги транспорт воситаларини 2025 йил 1 январга қадар Ўзбекистонга импорт қилишда божхона божининг, утилизация йиғимининг ва автотранспорт воситаларини сотиб олганлик учун автотранспорт йиғимларининг ноль ставкалари қўлланилади:
— “Евро 5” ва ундан юқори экологик тоифа талабларига мос келадиган автотранспорт воситалари (ТИФ ТН кодлари 8701 20, 8704 22 самосвалдан ташқари);
— Тиркамалар ва ярим тиркамалар (ТИФ ТН кодлари 8716 31, 8716 39).
Бундан ташқари, Европа иттифоқи мамлакатларида ишлаб чиқарилган, ишлаб чиқарилганига 7 йилдан ошмаган қуйидаги транспорт воситаларини 2025 йил 1 январга қадар Ўзбекистонга импорт қилишда мажбурий сертификатлашдан озод қилинади:
— “Евро 5” ва ундан юқори экологик тоифа талабларига мос келадиган юк ва махсус автотранспорт воситалари;
— Автомобиль транспортида юк ташиш учун фойдаланиладиган тиркамалар ва ярим тиркамалар.