Истеъмолчилар ҳуқуқларини ҳимоя қилиш агентлиги Матбуот хизматининг хабарига кўра, агентлик томонидан жорий йилнинг ўтган даврида дарахтларга реклама ўрнатиш бўйича аниқланган 1 300 дан ортиқ ҳолатдаги рекламалар зудлик билан олиб ташланди.
Шунингдек, агентлик ташқи рекламани моддий маданий мерос объектларида, йўл белгиларида ва светофорларда, уларнинг тиргакларида ёки ҳаракатни тартибга солиб турувчи бошқа ҳар қандай қурилмаларда ҳамда дов-дарахтларни пайҳон қилиш ва туташ ҳудуддаги ободонлаштириш воситаларини бузиш йўли билан жойлаштириш қонунга зид келишини таъкидлаган.
Қайд этилишича, агентлик томонидан Тошкент шаҳар Экология ва атроф-муҳитни муҳофаза қилиш бошқармасига ўзбошимчалик билан ўрнатилган ноқонуний рекламаларнинг атроф-муҳитга зарар етказаётгани юзасидан тегишли чора кўрилиши бўйича хат чиқарилди.
“Ҳурматли истеъмолчилар, @bexatoreklamabot Telegram-боти орқали сиз ташқи реклама воситаларининг дарахтда ўрнатилгани ҳақида агентликка хабар беришингиз мумкин’’, - дейилади хабарда.