Президент матбуот котиби Шерзод Асадов брифингда Шавкат Мирзиёевнинг ҳафталик иш режаси ҳақида маълумот берди.
Афғонистонда вужудга келаётган вазиятни ҳисобга олиб, хавфсизликка таҳдид солиши мумкин бўлган хатарлар бўйича яқин хориждаги ҳамкор мамлакатлар ва минтақадаги қўшнилар томонидан кўрилаётган чора-тадбирлар билан чуқур танишиш мақсадида Шавкат Мирзиёев бугун КХШТ — Коллектив хавфсизлик шартномаси ташкилоти давлат раҳбарларининг видеоанжуман шаклида ўтадиган саммитида таклиф этилган меҳмон сифатида иштирок этади.
Бундан ташқари, президентнинг ҳафталик иш режасидан қуйидагилар ўрин олган.
Тошкент шаҳрида амалга ошириладиган лойиҳалар тақдимоти, экологик ҳолатни яхшилаш ва яшил ҳудудларни кенгайтириш бўйича йиғилиш, спорт таълимини такомиллаштириш ҳамда Олимпия захирасини яратиш юзасидан видеоселектор ўтказилиши мўлжалланган.
Шунингдек, Тошкент шаҳрида атроф-муҳит муҳофазасига оид амалга оширилаётган лойиҳалар билан танишув ва жума куни янги хорижий элчиларга ишонч ёрлиқлари топшириш маросими ўтказилиши режалаштирилган.