Наманганда газ балонни портлаши натижасида икки уй ва бир автомобиль ёниб кетди. Бу ҳақда ФВВ Матбуот хизмати хабар берди.
Ҳодиса 17 август куни соат 19:08 да Наманган вилояти Учқўрғон тумани “Қумтўғон” МФЙ Янгиобод-18 кўчасида жойлашган уйларнинг бирида содир бўлган.
Мазкур ҳолат юзасидан Наманган вилояти ФВБнинг 2 та ёнғин ўчириш экипажи соат 19:14 да воқеа жойига етиб бориб, ёнғинни соат 19:38 да тўлиқ бартараф этишган.
Ёнғин натижасида хонадон шифт ва том қисмининг 65 кв.метр майдони ва уй-рўзғор буюмлари, дарвозахонада турган Lada Largus автомашинаси ҳамда қўшни хонадон том қисмининг 15 кв.метр майдони ёниб, зарарланган.
Шуниндек, ёнғин оқибатида уй эгаси куйиш тан-жароҳати олган.
Қутқарувчиларнинг тезкор ҳаракатлари натижасида хонадоннинг 500 кв.м майдони ёнғиндан сақлаб қолинган.
Ҳозирда ёнғин сабаби ва зарар миқдори аниқланиб, ҳодиса юзасидан дастлабки терговолди суриштирув ишлари олиб борилмоқда.