Сиёсатшунос Анвар Назир Facebook’даги саҳифасида “Толибон” ҳаракати Афғонистон ҳудудида Aлишер Навоий номи билан боғлиқ ҳар қандай маълумотнома ва рамзларни йўқ қила бошлагани, мактабларда ўзбек тилини ўқишни тақиқлаб қўйгани ҳақида ёзганди.
Ташқи ишлар вазирлиги расмий вакили ушбу ҳолатга муносабат билдирди.
“Ўзбекистон Ташқи ишлар вазирлиги вакилининг “Толибон” ҳаракати расмий раҳбарияти билан бўлиб ўтган суҳбати чоғида ушбу ахборотнинг ҳақиқатга зидлиги таъкидланди”, - дейилади хабарда.
Қайд этилишича, “Толибон” вакили ўзбек тили пушту ва дари тиллари билан бир қаторда, бундан буён ҳам Афғонистоннинг расмий тилларидан бири бўлиб қолишини тасдиқлаган.
Ўзбек тилини ўрганиш ва ривожлантиришга, толиблар расмий вакилининг маълумотига кўра, мамлакат янги раҳбарияти алоҳида эътибор қаратади.
ТИВга кўра баъзи билимсиз “таҳлилчи” ва журналистларнинг шубҳали шов-шувлар ва “қайноқ факт”лар илинжида очиқдан очиқ бузиб кўрсатилган ва ёлғон ахборотларни тарқатаётгани эса афсусланарли ҳолат ҳисобланади.