11 август куни Хоразм вилояти, Урганч шаҳар, Маърифатчи кўчасида ЙПХ ходими Ё. Комилов Malibu ҳайдовчисига тўхташ ишорасини кўрсатганига қарамай, ҳайдовчи инспекторнинг қонуний талабини бажармай ҳаракатланишда давом этган.
Ё. Комилов қоидабузар ҳайдовчи бошқарувидаги автомобиль маълумотларини алоқа воситаси ёрдамида кейинги чорраҳада хизмат олиб бораётган ЙПХ ходимлари А.Олимов ва О.Зариповларга етказган ва Malibu ҳайдовчиси Тинчлик кўчасида тўхтатилган.
Инспектор О. Зарипов ҳайдовчига ўзини таништириб, меъёрий ҳужжатларини тақдим қилишини сўраганда, ҳайдовчи 30 дақиқа давомида шахсини маълум қилмайди. ЙПХ ходимлари ҳайдовчига ҳудудий ИИБга бориб шахсига аниқлик киритилишини айтган вақтда ҳайдовчи ходимларга фаол қаршилик кўрсатган.
Ҳолат бўйича ўтказилган текширув якунига кўра, фуқаро Д.Б.га нисбатан Маъмурий жавобгарлик тўғрисидаги Кодекснинг 135 ҳамда 194-моддалари тартибида расмийлаштирилган маъмурий баённома асосли деб топилган.
Хизмат давомида ички ишлар вазирининг айрим меъёрий буйруқлари талабларига риоя қилмаганлиги боис, Хоразм вилояти ИИБ ЙҲХБ ЙПХ ходимлари Ё. Комилов ва А. Олимовларнинг ҳар бирига “ҳайфсан” интизомий жазо чораси қўлланилди.