«Ўзбекнефтгаз» АЖ тасарруфидаги нефтни қайта ишлаш заводларида 2020 йил январь-октябрь ойлари якуни билан 1 млн. 546,4 минг тонна углеводород хом ашёси қайта ишланди. Бу ҳақда компания Матбуот хизмати маълум қилди.
Натижада 690,9 минг тонна автобензин, 532,8 минг тонна дизель ёнилғиси, 75,0 минг тонна авиакеросин ҳамда 94,1 минг тонна мазут ёқилғилари ишлаб чиқарилди.
Ишлаб чиқариш қувватларидан фойдаланиш кўрсаткичлари 70,7 фоизни (режа 103,5 фоиз, ўтган йилга нисбатан 101,5 фоиз) ташкил этади.
Жорий йилнинг I чорагида «Бухоро НҚИЗ» МЧЖда Евро-4,5 экологик тоифадаги дизель ёнилғисини ишлаб чиқариш йўлга қўйилиб январь-октябрь ойларида якунигача жами 58,2 минг тонна Евро-4,5 дизель ёнилғиси ишлаб чиқарилди.
Бундан ташқари, республика истеъмолчиларининг талабидан келиб чиққан ҳолда, октябрь ойида 2,3 минг тонна Евро-3 экологик тоифасидаги дизель ёнилғиси ишлаб чиқарилди.
Жорий йилнинг январь-октябрь ойларида республика истеъмолчиларига жами бўлиб 820 минг тонна автобензин ва 616 минг тонна дизель ёнилғиси етказиб берилди.
Маълумот учун: жойларда 154 минг тонна дизель ёнилғиси ва 73 минг тонна автобензин захиралари яратилган.
Эслатиб ўтамиз, аввалроқ Давлат статистика қўмитаси Ўзбекистонда шу йилнинг январь-сентябрь ойларида 769,1 минг тонна автомобиль бензини ишлаб чиқарилгани ҳақида маълумот берган эди.
