ИИВ ЙҲХББ Ахборот хизмати ижтимоий тармоқда тарқалган "Тошкентда автобусда ёнғин чиқди" сарлавҳали хабар юзасидан маълумот берди.
Маълум қилинишича, жорий йилнинг 22 декабрь куни соат 14:50 ларда, Тошкент шаҳар Яккасарой тумани Бобур кўчасида ҳайдовчи, 1991 йилда туғилган З.С. 12-сонли автобус саройига тегишли бўлган йўловчи ташувчи автобусни 47-йўналишда бошқариб кетаётган вақтида, автобуснинг двигатель қисмида ёнғин юзага келган.
Ёнғин ўт ўчирувчилар томонидан бартараф этилган. Ёнғин натижасида ҳеч ким тан жароҳати олмаган.
Қайд этилишича, мазкур ҳодиса юзасидан Тошкент шаҳар ИИББ ЙҲХБ ва ФВБ ходимлари томонидан суриштирув ишлари олиб борилиб, ёнғин юзага келиш сабабларига аниқлик киритилмоқда.
