"Ўзбеккино" миллий алентлигининг маълум қилишича, Акбар Бектурдиевнинг “Узбечка”, Жаҳонгир Аҳмедовнинг “Бўйсунмас” (“Жиззах қўзғолони”) ҳамда Муҳаммадали Искандаровнинг “Мамадали Топволдиев” фильмлари съёмка жараёнлари Беларусда бўлиб ўтади.
Бу ҳақда кеча, 18 январь куни "Ўзбеккино"да “Беларусфильм” Миллий киностудияси Бош директори Владимир Карачевский билан бўлиб ўтган учрашувда маълум қилинган.
Муҳаммадали Искандаровнинг Иккинчи жаҳон уруши қаҳрамони Мамадали Топволдиев ҳақидаги фильми икки давлат ўртасидаги ко-продукция бўлиши режалаштирилган, кейинчалик фильм билан боғлиқ шартнома ва меморандумлар имзоланади.
Унда лойиҳанинг молиявий харажатлари, тасвирга олиш объектлари ва бошқа рақамлар кўрсатилади.
Маълумот учун, 2020 йил Беларусда “Илҳақ” (реж. Жаҳонгир Аҳмедов), “Мерос” (реж. Ҳилол Насимов), “Муҳаббат баҳори” (реж. Иброҳим Расулов) фильмларининг тасвирга олиш ишлари бўлиб ўтган.
