Қирғизистон Республикаси Бош вазири Сапар Исаков бугун, 30 август куни Ўзбекистон Республикаси Бош вазири Абдулла Арипов билан телефон суҳбати давомида долзарб масалалар бўйича икки томонлама ҳамкорликни муҳокама қилди. Телефон суҳбати Ўзбекистон ташаббуси билан амалга оширилди, деб хабар қилмоқда Қирғизистон ҳукумати матбуот хизмати.
Ўзбекистон Бош вазири Абдулла Арипов Сапар Исаковни Қирғизистон Бош вазири этиб тайинлангани билан табриклади ва унга ишларида муваффақиятлар тилади.
Ҳукумат раҳбарлари савдо-иқтисодий ва маданий-гуманитар соҳалардаги ҳамкорликни ривожлантиришни муҳокама қилдилар. Томонлар шунингдек, барча долзарб масалалар бўйича ўзаро манфаатли ҳамкорлик қилишга тайёр эканликларини билдирдилар.
Бундан ташқари суҳбат давомида Сапар Исаков ва Абдулла Арипов Ўзбекистон Президенти Шавкат Мирзиёевнинг Қирғизистон Республикасига ташрифини муҳокама қилдилар. Президент ташрифи 2017 йилнинг 6 сентябрь санасига режалаштирилган.
