Ўзбекистон миллий терма жамоаси Жаҳон чемпионатидаги дастлабки икки учрашувда Колумбия ва Португалия терма жамоаларига мағлуб бўлди. Айниқса, Португалиядан қабул қилиб олинган 0:5 ҳисобидаги мағлубият мухлисларнинг кайфиятига жиддий таъсир қилди. Аммо рақамлар ва турнир регламентига назар ташласак, Ўзбекистоннинг плей-оффга чиқиш имконияти ҳали ҳам сақланиб қолмоқда.
Нега гуруҳдан чиқишга ҳали ҳам имконият бор?
Ушбу Жаҳон чемпионатида тарихда илк бор 48 та терма жамоа иштирок этмоқда. Янги форматга кўра, ҳар бир гуруҳдан биринчи ва иккинчи ўринни эгаллаган терма жамоалар билан бир қаторда энг яхши саккизта учинчи ўрин эгалари ҳам кейинги босқичга йўл олади. Шу боис икки турдан кейин очкосиз қолган Ўзбекистон миллий терма жамоаси ҳам назарий жиҳатдан мусобақани давом эттириши мумкин.
Муаммо — тўплар фарқи!
Колумбияга қарши баҳсда Ўзбекистон яхши таассурот қолдирган, ҳатто Аббосбек Файзуллаев мамлакат тарихидаги мундиаллардаги илк гол муаллифи бўлганди. Бироқ 1:3 ҳисобидаги мағлубият ва кейинги турда Португалиядан қабул қилинган 0:5 ҳисобидаги йирик мағлубият вазиятни оғирлаштирди. Ҳозирда Ўзбекистоннинг тўплар фарқи салбий кўринишда.
Конго ДРга қарши ўйин — финалдан ҳам муҳим!
Гуруҳдаги сўнгги турда Ўзбекистон Конго ДР билан баҳс олиб боради. Африкаликлар биринчи турда Португалия билан дуранг ўйнаган ва Колумбияга қарши яхши қаршилик кўрсатган терма жамоа ҳисобланади. Демак, бу рақибни кучсиз дейиш мумкин эмас.
Ўзбекистон учун сценарий оддий:
Ғалаба — умид сақланиб қолади.
Дуранг — деярли имкониятларни йўққа чиқаради.
Мағлубият — мусобақа билан хайрлашиш дегани.
Шу билан бирга, ғалаба қанча йирик бўлса, учинчи ўринлар рейтингида шунча юқори кўтарилиш имкони пайдо бўлади.
Каннаваро қандай хулоса чиқариши керак?
Португалияга қарши баҳс МТЖ ҳимоясида жиддий муаммолар борлигини кўрсатди. Футболчилар рақибнинг юқори даражадаги босимига қарши барқарор ҳаракат қила олмади. Бироқ Конго ДР Португалия даражасидаги жамоа эмас. Шунинг учун Каннаваро шогирдлари ҳужумкорроқ ўйин намойиш этиши мумкин.
Энг муҳими, футболчилар руҳий жиҳатдан тикланиши лозим. Чунки икки мағлубиятдан кейин ҳам тақдир ҳали ўз қўлларида қолмоқда.
Хулоса
Ўзбекистоннинг гуруҳдан чиқиш имконияти аввалгидек юқори эмас. Колумбия плей-офф йўлланмасини ҳал қилиб бўлди, Португалия эса иккинчи ўрин учун асосий даъвогар бўлиб турибди. Аммо янги формат туфайли учинчи ўрин орқали ҳам кейинги босқичга чиқиш мумкин. Бунинг учун МТЖ аввало Конго ДРни мағлуб этиши, кейин эса бошқа гуруҳлардаги натижалар ўз фойдасига ишлашини кутиши керак.
Шу сабабли, Ўзбекистон миллий терма жамоаси учун мундиал ҳали тугагани йўқ. Атлантадаги 90 дақиқа терма жамоамизнинг тарихий натижа қайд этишини ёки гуруҳда қолиб кетиб мусобақани эрта тарк этишини ҳал қилиб беради.
Жаҳонгир Сотволдиев АҚШдан UzNews.uz учун махсус
Комментарии