Тошкент вилояти халқ депутатлари Кенгаши қарорига мувофиқ, Оҳангарон тумани ҳудудидан ўтувчи халқаро аҳамиятга эга А373 «Тошкент – Андижон» автомобиль йўлининг 103–131-километрлар қисмида ҳаракат тезлиги чекланди.
Ҳужжатга кўра, мазкур қарор йўл-транспорт ҳодисаларининг олдини олиш, фуқаролар хавфсизлиги ва йўл ҳаракати хавфсизлигини таъминлаш мақсадида қабул қилинган.
Эндиликда М1 тоифасидаги енгил автомобиллар, М2 тоифасидаги оғирлиги 5 тоннагача бўлган автобуслар ҳамда N1 тоифасидаги оғирлиги 3,5 тоннагача бўлган юк автомобиллари учун максимал тезлик 80 км/соат этиб белгиланди.
N2 тоифасидаги (3,5 тоннадан 12 тоннагача бўлган) ва N3 тоифасидаги (12 тоннадан ортиқ) юк автомобиллари учун эса тезлик чеклови 50 км/соат қилиб ўрнатилди.
Мазкур қарор қабул қилинишига қадар ушбу йўл қисмида барча транспорт воситалари учун умумий тезлик чеклови 100 км/соатни ташкил этар эди.
Комментарии