Ўзбекистоннинг Чехиядаги элчихонаси Вацлав Гавел номидаги Прага халқаро аэропортининг йўналишларни ривожлантириш бўйича менежери Мартин Татек билан онлайн учрашув ўтказди.
Томонлар мамлакатлар ўртасида сайёҳлик ва ишбилармонлик оқимини кўпайтириш, авиация соҳасидаги ҳамкорлик масалаларини муҳокама қилдилар.
Мартин Татекнинг сўзларига кўра, Ўзбекистон чехиялик сайёҳларда катта қизиқиш уйғотмоқда. Сайёҳлар мамлакатнинг бой тарихи, яхши сайёҳлик инфратузилмаси ва юқори даражадаги хизмат кўрсатишини таъкидламоқда. Бундан ташқари, йўналиш Чехия бизнеси учун ҳам тобора жозибадор бўлиб бормоқда.
Учрашув иштирокчилари Прага ва Тошкент ўртасида мунтазам тўғридан-тўғри рейсларнинг йўлга қўйилиши туризм ва ишбилармонлик алоқаларининг ривожланишига жиддий туртки бериши мумкинлигини таъкидладилар. Ҳозирги вақтда йўловчиларнинг аксарияти соат транзит рейсларидан фойдаланмоқда.
Тўғридан-тўғри рейслар туроператорлар ва мустақил саёҳатчиларга саёҳатларни олдиндан режалаштириш, турпакетларни шакллантириш ва йўналишни фаолроқ тарғиб қилиш имконини беради.
Чехия томони Uzbekistan Airways авиакомпаниясини эҳтимолий асосий ҳамкор сифатида кўрмоқда, бироқ бошқа ташувчилар, шу жумладан хусусий ташувчилар билан ҳамкорликни истисно этмайди.
Март ойи бошида Прага аэропорти, миллий авиакомпания ва манфаатдор ташувчилар иштирокида яна бир онлайн учрашув ўтказилиши режалаштирилган. Унда мунтазам авиақатновларни йўлга қўйиш шартлари ва қўллаб-қувватлаш чоралари муҳокама қилинади.
Комментарии