Ҳокимият хабарига кўра, бунга бир қатор омиллар сабаб бўлган: қишки эскириш, музга қарши реагентлардан фойдаланиш, узоқ давом этган ёғингарчилик ва юқори намлик. Сув йўл қопламасидаги майда ёриқларга кириб, унинг устки қатлами ҳамда асосини заифлаштиради. Натижада, айниқса транспорт ҳаракати зич бўлган йўлларда нуқсонлар тезроқ юзага чиқади.
«Бундай емирилишлар, одатда, хизмат муддати якунига яқинлашган ва жиддий жисмоний эскириш тўпланган участкаларда қайд этилади», — дейилади хабарда.
Мутахассислар кўча-йўл тармоғини ўрганиб чиқиб, тикланиши лозим бўлган участкалар рўйхатини шакллантирди. Бундай участкаларнинг умумий ҳажми 816 023 кв. метрни ташкил этади. Шундан 609 673 кв. метри туманлар ҳиссасига, 206 350 кв. метри эса шаҳар марказий кўчаларига тўғри келади.
Туманлар кесимида (кв. метр ҳисобида):
Бектемир тумани — 53 160;
Мирзо Улуғбек тумани — 50 471;
Миробод тумани — 52 287;
Олмазор тумани — 48 087;
Сергели тумани — 50 529;
Учтепа тумани — 50 000;
Чилонзор тумани — 54 000;
Шайхонтоҳур тумани — 51 182;
Юнусобод тумани — 47 546;
Яккасарой тумани — 51 000;
Янгиҳаёт тумани — 51 000;
Яшнобод тумани — 50 411.
«Ҳозирги об-ҳаво шароитида, узлуксиз ёғингарчилик даврида қопламани тўлиқ технологик тиклаш барқарор натижа бермайди. Ишларнинг асосий қисми об-ҳаво барқарорлашиб, асос намлиги камайгач амалга оширилади. Фаол босқичнинг тахминий бошланиш муддати — март ойининг биринчи ўн кунлиги», — дея маълум қилди ҳокимият.
Шунингдек, жорий йилда кўча-йўл тармоғи ва транспорт инфратузилмаси бўйича алоҳида ҳажмдаги капитал ишлар ҳам режалаштирилган. Бунга режали таъмирлар ва айрим участкаларда йўл қопламасини янгилаш киради.
Ҳокимият таъкидлашича, локал (ямали) таъмир ва капитал ишлар бир хил кўчаларда бир вақтнинг ўзида амалга оширилмайди. Локал таъмир хавфсиз ҳаракатни тезкор тиклашга қаратилган бўлса, капитал ишлар бошқа кўчаларда тизимли янгилашни назарда тутади.
Комментарии