АҚШнинг Нью-Йорк штатида содир бўлган йўл-транспорт ҳодисаси оқибатида 11 ёшли ўзбекистонлик Амира Аминова ҳалок бўлди. Бу ҳақда Ўзбекистон Республикасининг Нью-Йорк шаҳридаги бош консулхонаси хабар берди.
Консулхонаси марҳум қизалоқнинг онасига, яқинлари ва барча қариндош-уруғларига ушбу оғир ва қайтиб тўлдириб бўлмас йўқотиш муносабати билан самимий ва чуқур таъзия билдирди.
Бош консулхона боланинг онаси билан доимий алоқада бўлиб, шунингдек Нью-Йорк шаҳридаги тегишли ваколатли идоралар билан ҳамкорлик қилмоқда.
“Ўзбекистон Республикасининг Америка Қўшма Штатларидаги дипломатик муассасалари марҳуманинг оиласига биринчи мурожаатданоқ ва тўлиқ ҳажмда зарур ёрдам кўрсатишга тайёр”, - дейилади хабарда.
Маҳаллий ОАВнинг хабар қилишича, ҳодиса пайшанба куни соат 15:00 дан кейин содир бўлган.
11 ёшли Амира Аминова "Бэз Бич" авенюсида пиёдалар ўтиш жойидан ўтаётган вақтида ўнг тарафга бурилаётган мактаб автобуси уни уриб кетган. Воқеа оқибатида, Амира вафот этган.
Маълумотларга кўра, Бруклинда яшовчи 62 ёшли автобус ҳайдовчиси Вава Аурелус пиёдага йўл бермаслик ва эҳтиёт чораларини кўрмасликда айбланмоқда.
Комментарии