Малайзиянинг Spora Global Sdn Bhd компанияси Тошкент вилоятида замонавий гольф-курорт мажмуасини қуриш бўйича инвестициявий таклиф тақдим этди.
Бу масала Ўзбекистоннинг Малайзиядаги элчиси Каромиддин Гадоев ҳамда компаниянинг ижроия директори Фио Фахми ўртасида бўлиб ўтган учрашувда муҳокама қилинди, деб ёзади «Дунё» АА.
Фио Фахмининг сўзларига кўра, мажмуа жаҳон даражасидаги гольф-курорт мақомига эга бўлади. Лойиҳа доирасида нафақат профессионал гольф майдони, балки гольф-клуб биноси, 4 ва 5 юлдузли меҳмонхоналар, замонавий турар жойлар, ресторан ва соғломлаштириш мажмуаси, аквапарк ҳамда қишки мавсум учун чанғи иншоотлари қурилиши режалаштирилган.
Инвесторлар ушбу лойиҳани Тошкент вилояти ҳокимлиги билан давлат-хусусий шериклик асосида, жумладан қўшма корхона ташкил этиш орқали амалга оширишни таклиф қилдилар.
Фио Фахми яқин кунларда компания раҳбарияти ва мутахассисларидан иборат делегация лойиҳани амалга ошириш имкониятлари ҳамда жойлашувини батафсил ўрганиш мақсадида Ўзбекистонга ташриф буюришини маълум қилди.
Spora Global Sdn Bhd компанияси 2012 йилда ташкил этилган. Компаниянинг асосий фаолияти меҳмонхона ва курортларни лойиҳалаш, қуриш, бошқариш, таъмирлаш ҳамда дизайн ишларини амалга оширишдан иборат. У Сингапур, Австралия, Вьетнам, Индонезия, Янги Зеландия ва Шотландияда гольф-клубларни бошқаради.
Комментарии