30 декабрь куни президентлар Шавкат Мирзиёев ва Владимир Путиннинг телефон орқали мулоқоти бўлиб ўтди, дея хабар қилди Ўзбекистон президенти матбуот хизмати.
Суҳбат аввалида давлатимиз раҳбари Россия президентининг Новгород вилоятидаги қароргоҳига ҳужум қилишга уринишни қатъий қоралади.
Унинг таъкидлашича, бундай хатти-ҳаракатлар барқарорлик ва хавфсизликка, шу жумладан узоқ муддатли тинчликка эришишга қаратилган саъй-ҳаракатларга таҳдид солади.
Олий даражадаги келишувларни амалга ошириш нуқтаи назаридан Ўзбекистон-Россия стратегик шериклик ва иттифоқчилик муносабатларини янада ривожлантириш масалалари кўриб чиқилди. Халқаро ва минтақавий аҳамиятга молик долзарб масалалар юзасидан ҳам фикр алмашилди, бўлажак тадбирлар режаси муҳокама қилинди.
Суҳбат якунида етакчилар кириб келаётган янги – 2026 йил муносабати билан бир-бирини самимий қутлаб, мустаҳкам соғлик, бахт-саодат ва фаровонлик, икки мамлакатнинг биродар халқларига эса тинчлик-осойишталик ва бардавом равнақ тиладилар.
Эслатиб ўтамиз, 28-29 декабрь кунлари Россия Мудофаа вазирлиги Владимир Путиннинг Нижний Новгород вилоятидаги қароргоҳига 91 та дрон ҳужумини қайтарди. Россия ТИВ раҳбари президент қароргоҳига ҳужум қилишга уриниш Украина раҳбарияти томонидан амалга оширилганини ва ҳужумдан кейин Москванинг музокаралар позицияси қайта кўриб чиқилишини айтди.
Комментарии