Маълумотларга кўра, судланувчи 2024 йил ноябрда ишлаш мақсадида Россияга борган ва 2025 йил март ойида катта пул миқдори ваъда қилингани учун Россия армиясига ёлланган. Воронеж шаҳрида 10 кунлик ҳарбий тайёргарликдан ўтиб, Луганскдаги ҳарбий қисмга жойлаштирилган. У 2025 йил июнь ойигача Украинага қарши жанговар ҳаракатларда иштирок этган.
Жангларнинг бирида Украина армияси дрони ҳужуми натижасида у оғир жароҳат олган. Кейин Москвада даволаниб, яна фронтга юборилган. Судланувчи у ердан қочиб, Қозоғистон орқали 2025 йил 4 август куни Ўзбекистонга қайтган.
Терговда ва телефондан топилган фотомаълумотлар орқали унинг жанговар ҳаракатларда қатнашгани тасдиқланди. Суд тиббиёт экспертизаси унда ўртача оғир тан жароҳатлар борлигини қайд этди.
Суд айбдорнинг айбини тан олгани, пушаймонлиги, аввал судланмагани ва соғлик ҳолатини инобатга олган ҳолда унга нисбатан енгиллаштирилган жазо қўллади.
Хукмга кўра, у ЖКнинг 154-моддаси 1-қисми бўйича айбли деб топилиб, 3 йилга озодликдан маҳрум этилди.
Комментарии