Рақобатни ривожлантириш ва истеъмолчилар ҳуқуқларини ҳимоя қилиш қўмитаси Yandex Uzbekistan билан бир гуруҳга кирувчи Plus Entertainment Services Holding Ltd компаниясининг видео ва аудио контентни онлайн узатиш ва алмашиш хизматларини тақдим этувчи Allmedia Safe Service ва Anyway рақамли платформасига эгалик қилувчи компанияларнинг улушларини сотиб олиш бўйича аризасини кўриб чиқди.
Аввалроқ қўмита Allmedia Safe Service’ни видеоконтент, жумладан, телевидение ва кино, аудио маҳсулотлар, жумладан, мусиқани онлайн узатиш бозорида устун мавқега эга рақамли платформа оператори сифатида тан олган эди. Худди шу бозорда Yandex’га тегишли Кинопоиск рақамли платформаси аллақачон мавжуд.
Қўмитанинг махсус комиссияси битим шартларини таҳлил қилиб, уни маъқуллаш мумкин деган хулосага келди. Шу билан бирга, тартибга солувчи орган тадбиркорлар ва Allplay платформасининг якуний фойдаланувчилари манфаатларини ҳимоя қилишга қаратилган мажбурий талабларни илгари сурди. Хусусан, Allplay оператори видео ва аудио контентни онлайн узатиш бозорининг мустақил иштирокчиси сифатида фаолиятини сақлаб қолиши керак.
Yandex Plus экотизимига қўшилгандан сўнг, Allplay хизмати ягона платформанинг бир қисмига айланади. Фойдаланувчилар фильмлар ва сериалларни томоша қилишлари, шунингдек, мусиқа, аудиокитоблар, спорт трансляциялари ва бошқа Yandex Plus хизматларидан фойдаланишлари мумкин бўлади.
Yandex Uzbekistan компанияси баёнотига кўра, интеграция обуначиларнинг имкониятларини кенгайтиради ва кўнгилочар контентни Ўзбекистон бозорида янада арзонроқ қилади.
Комментарии