Кеча, 27 ноябрь куни Ўзбекистоннинг Сингапурдаги элчиси Алишер Қаюмов Австралия генерал-губернатори Саманта Мостинга ишонч ёрлиқларини топширди, деб хабар бермоқда "Dunyo" АА.
Расмий маросимдан сўнг бўлиб ўтган суҳбат чоғида сўнгги йилларда сиёсий, савдо-иқтисодий, илмий-маърифий ва бошқа соҳаларда изчил ривожланиб бораётган Ўзбекистон-Австралия муносабатларининг бугунги ҳолати ва истиқболлари атрофлича муҳокама қилинди.
Австралия ва Ўзбекистон иқтисодиётларининг ўхшашлиги, жумладан, пахта ва тоғ-кон саноатининг муҳим ўрни қайд этилиб, бу инновациялар ва инвестициялар соҳасида ўзаро ҳамкорлик учун кенг истиқболлар очиши таъкидланди.
Австралия генерал-губернатори икки томонлама муносабатларни янада мустаҳкамлашга тайёрлигини билдирди.
Эслатиб ўтамиз, Алишер Қаюмов Сингапурга 2024 йил март ойи ўрталарида келган эди. У Ўзбекистоннинг Сингапурдаги (2018-2024) ва Австралиядаги (2022-2024) ўриндошлик асосида элчиси сифатида аккредитациядан ўтган Қаҳрамон Шокиров ўрнини эгаллади. Ўтган йилнинг апрель ойида Алишер Қаюмов Сингапур президенти Тарман Шанмугаратнамга ишонч ёрлиқларини топширди.
Комментарии