20 ноябрь куни соат 09:00 да автоматик мониторинг станциялари Тошкентда ҳаво ифлосланишининг юқори кўрсаткичларини қайд этди.
PM10 майда дисперсияли заррачалар миқдори 299 мкг/м³ ни ташкил этди, бу эса йўл қўйиладиган меъёр (300 мкг/м³)дан бир оз паст.
PM2.5 миқдори эса 202 мкг/м³ гача етди, бу белгиланган меъёрдан (ПДК — 60 мкг/м³) 3,4 баробар юқори.
Мониторинг хариталарига кўра, энг ифлосланган ҳудудлар пойтахтнинг шимолий ва шимолий–ғарбий қисмларида кузатилмоқда — AQI кўрсаткичлари 258 ва 250 пунктга етган. Жанубий–ғарбий қисмида ҳам юқори даража қайд этилган — 246 AQI гача. Шарқий ҳудудларда ифлосланиш даражаси бироз пастроқ бўлса-да, барибир юқори ҳисобланади.
Ўзгидрометнинг таъкидлашича, ҳаво сифати ёмонлашишига кескин ҳарорат ўзгариши сабаб бўлган. Ҳарорат инверсияси туфайли ифлослантирувчи заррачалар атмосферанинг қуйи қатламларида тўпланиб қолмоқда, бу эса концентрация ошишига олиб келади.
Пойтахт аҳолиси ва меҳмонларига очиқ ҳавода қолишни чеклаш ва ҳимоя ниқобларидан фойдаланиш тавсия қилинмоқда.
Шу каби об-ҳаво шароити республика бўйлаб яна бир неча кун давом этади.
Комментарии