Маълумотга кўра, Отамуродов мазкур таклиф билан Ашхободда Халқ Маслахати мажлисида, халқ ҳокимиятининг олий органи раҳбари Гурбангули Бердимуҳамедов раислигида чиқиш қилган.
Оқсоқолнинг сўзларига кўра, республика раҳбариятининг саъй-ҳаракатлари туфайли кўп йиллардан бери мамлакатда иш ҳақи, нафақа, давлат тўловлари ва талабалар стипендиялари изчил равишда ошириб келинмоқда.
Отамуродов халқ "тинч, фаровон ва бахтли ҳаёт кечираётгани", аҳолининг ижтимоий-маиший шароити эса юқори даражага етганини таъкидлади.
Отамуродовга кўра, бундай имтиёзлар дунёда ҳеч бир мамлакатда мавжуд эмас, бугун эса ҳар бир оила зарур бўлган барча нарсани олаяпти. Шу муносабат билан у иш ҳақи, нафақа, давлат тўловлари ва талабалар стипендияларини оширишни тўхтатиш таклиф қилиб, Бердимуҳамедовдан ушбу таклифни қўллаб-қувватлашни сўраган.
Маош, нафақа ва тўловларни оширишдан тежалган маблағларни «мамлакатни янада ривожлантириш» ва «бошқа муҳим йўналишларга» йўналтириш таклиф этилмоқда.
Туркманистонда ўн йилдан ортиқ вақтдан бери ҳар йили давлат раҳбарининг фармони билан бюджет муассасалари, хўжалик ҳисобидаги корхоналар ва жамоат бирлашмалари ходимларининг иш ҳақи, шунингдек, нафақа, давлат тўловлари ва стипендиялар 10 фоизга ошириб келинган.
Ҳозирги кунда Туркманистонда энг кам иш ҳақи 1410 манатни (тахминан $400), пенсия эса 550 манатни (тахминан $155) ташкил қилади.
Комментарии