Бугун, 29 август куни Шавкат Мирзиёев Тошкент шаҳридаги "Янги Ўзбекистон" кўчасида қурилган автомобиль тоннели билан танишди. Бу ҳақда Президент матбуот хизмати хабар берди.
Янги туннелнинг узунлиги 468 метр, кенглиги 25 метрни ташкил қилади. Унинг ўтказиш қобилияти соатига 10 мингдан ортиқ автомобилни ташкил этади.
Туннел йўл ҳаракати вақтни икки баробар қисқартиради, кунига тахминан 1 тонна ёқилғини тежаш ва атмосферага зарарли чиқиндилар чиқишини 2 тоннага камайтириш имконини беради.
Туннел устида яшил ҳудуд барпо этилган бўлиб, бу орқали "Янги Ўзбекистон" боғи билан Олимпия шаҳарчаси ўртасида пиёдаларнинг хавфсиз ҳаракати таъминланган.
Шунингдек, мазкур йўналишда келгусидаги метро йўли учун туннел ва станция ҳам қурилган.
Давлат раҳбари туннел замонавий стандартларга мувофиқ қурилганига эътибор қаратди. Таъкидланишича, бундай қулай йўллар аҳоли учун шароит яратади ва туризм ривожига ҳисса қўшади.
Комментарии